My hart se punt(e)….

Dis nou Francois op 14maande en Bula (Renier) op 14 en ‘n halwe jaar. Hulle word net mooier en mooier by die dag…. Sal julle op hoogte hou!

Advertisements

Augustus 5, 2008 at 12:08 nm 7 Kommentaar

Liewe Kopdokter….

Ek is hier op aandrang van my dokter. Hy weet van my dogterjie, fok, almal weet, maar niemand weet hoe ek voel nie en ek het nie die krag om daaroor te praat met iemand nie want ek soek nie simpatie nie. Meeste mense redeneer mos, ek het haar nie geken nie, so hoekom huil ek? Ja, hoekom huil ek? Hoekom voel ek skuldig oor haar dood? Hoekom voel ek soos ‘n slegte ma? Ek moes mos geweet het daar is fout? Nou die drome oor haar – wrede, egte drome – om vir my wat te sê? Om my te herinner dat ek my dogtertjie gefaal het?

Die Vrydagaand het ek gedroom Marlene is dood, en Saterdagoggend kielie ek my groot pens en sy gee ‘n wilde skop in my sy, ek glimlag… dit was die laaste skop. Ek het gaan shower – sy was mal daaroor  – en daar is niks! NIKS! Weet jy hoe dit voel? Ek is dadelik kliniek toe vir die sonar. Nog nooit het ek ‘n sonar so fyn dopgehou soos daardie Saterdag nie, wil nie my oë knip nie want ek is bang ek mis ‘n beweging of ‘n hartkloppie… daar was NIKS.

Hospitaal toe. Nee sy’s dood – jammer. Eers word daar gesê ek moet normaal “kraam” en my senuwees was klaar. Gelukkig 😦 het sy teveel gedraai en moes ek ‘n keiser kry. Epidural. Ek’s wakker terwyl hulle my “hart” uit my ruk!!!!!!!!!! Ek wil nie kyk nie, ek wil haar nie sien nie, die kind wat ek vermoor het. Ek word in ‘n kamertjie gesit saam ander ma’s MET BABAS! Ek huil en die dokter sê ek moet  my eie kamer kry – steeds in die kraamafdeling…. deur die nag huil die babas en ek wil opspring en troos – maar dis nie myne om te troos nie – ek wil van my kop af raak.

Word ontslaan en stap uit die hospitaal uit met ‘n sak vol babaklere en produkte en ‘n leë “carrycot”. Gaan huistoe en klim in die bed. Trek die kombers oor my kop en wil net slaap. Ek kan nie, ek het vir Renier wat ook hartseer is en ek moet sterk wees vir hom, daar is nie tyd vir tjank en depro wees nie, daar is nog ‘n kind wat my nodig het.

Ek e-mail vir John Edward van Crossing Over om te hoor waar is sy, wie kyk na haar ? Is sy warm en okay? Al antwoord wat ek kry, is dat sy by familie is wat reeds oorlede is – Ouma Bekkie? Oupa Dad? Pappa? Oom Boet? Moet ek nou beter voel? Ek wou na haar gekyk het, met haar gespeel het, daar gewees het met haar eerste skooldag, haar eerste kêrel en hartseer, met haar baklei het oor haar kleredrag en slegte maatjies, saam haar gelag het oor simpel dogtertjie goed, haar matriekafskeid, haar troue….

Ja ek mis haar elke dag –  party dae is dit erger wat ek net wil slaap en tjank, ek dink daaraan dat ek geglimlag het toe sy haar laaste skop gegee het!!!!! My kindjie het versmoor en ek glimlag!!!! Hoe siek kan jy kry? Ander dae kan ek glimlag en glo sy’s oraait… Nee wat, niemand gaan of kan my anders oortuig nie, om ‘n kind te verloor is die wreedste ding wat kan gebeur met ‘n gesin. Ek voel “useless” en dink ek is nie goed genoeg om ‘n kind in die wêreld te bring nie… Eks goed genoeg vir niks…

Vandat sy dood is, maak ek veertjies bymekaar – wittes. Ek glo vas dit is sy wat my wys dat sy by my is. Ek het ‘n hele juwelekissie vol veertjies. Dis al vier en ‘n halwe jaar….

Dokter? Ek sal weer met jou kom praat, vir jou my “scrapbook” wys wat ek vir haar gemaak het.  Briefies wat ek vir haar geskryf het…

Maar jy sê niks, ek wil net hê jy moet luister….

Augustus 1, 2008 at 12:45 nm 2 Kommentaar

Is dit Jesus of my onderbewussyn?

My hart is bitterlik seer vandag… Gisteraand het ek gedroom van Marlenetjie Dit was baie eg en ek het myself wakker gehuil. Die ergste van alles is, dit was wreed en ek voel half kwaad vir Jesus want ek mis haar so baie, elke dag!!!!!!!!!!!!!!!!!!!! en dan droom ek sulke goed. Dis net vir my onregverdig en ek weet dit gaan my weer weke vat om reg te kom. Ek voel depro en hartseer en alles voel net weer te veel vir my. Ek weet ek is nie die eerste vrou wat ‘n kind verloor het nie en defnitief ook nie die laaste nie, maar dit maak nie die gemis erger nie en dit regverdig beslis nie so ‘n droom nie!!!!!

Ek is by Marlene se begrafnis en ek haal haar uit die kis. Sy lyk so mooi met die blonde haartjies wat krul op die punte. Sy maak haar ogies oop asof sy geslaap het en glimlag vir my.  Ek sit haar neer op die grond en sy begin kruip en lag. Wanneer ek haar roep, kyk sy vir my en kom aangekruip.

My suster sit by my en ek vra haar of sy dink Marlenetjie gaan dalk breinskade hê omdat sy dood was vir so lang ruk? Sy het my aangekyk asof ek ‘n klap van die windmeul weg het en op die lelikste manier denkbaar vir my geskreeu:” Maak oop jou f@kken oë, jou kind is dood!”

My hart wil breek en ek weet nie hoe om regtig te sê hoe ek voel nie. Dis net bitter, bitter seer….

Julie 29, 2008 at 11:32 vm 5 Kommentaar

Ek’s soooooooo besig!!!!!!

Sorry julle maar ek is sooooo besig ek kry nie eers kans om my spoeg te sluk of my neus te blaas nie! My tafel is al nat gekwyl…. Chat later weer!

Julie 10, 2008 at 11:26 vm 3 Kommentaar

WêLA KAPêLA!!!!!!!!!!!!

ANTON HET VIR MY ‘N NUWE WASMASJIEN EN YSKAS GEKOOP!!!!!!!!!!! Ek kan nie wag om te gaan wasgoed was nie…. LOL.  Soos ‘n kind sê ek jou, soos ‘n kind….

Bring julle washing, ek gaan groot vannaand!

😉

Julie 3, 2008 at 8:24 vm 7 Kommentaar

Is jy ‘n boelie?

Vandag is ek redelik broos. Ek werk op ‘n nuwe plek en vandag hoor ek mos nou of ek bly of gly. Aan die een kant hoop ek dis positief dat ek kan bly, maar aan die anderkant wil ek net waai. Dis nie die werk self nie, want ek is nie dommer as grond nie, maar ‘n sekere vroumens wat saam my werk. Kyk, ek is nie ‘n “fighter” nie, en ek moet erken ek’s ‘n maklike teiken vir iemand om op te trap…

Van dag een af, krap sy nou vir my. Sy is nou eers twee maande hier maar gaan aan of sy die baas is. Ek moet haar “filing” doen en goed soek wat sy nodig het… huh? Ek het dit so rukkie gevreet en op een lieflike Maandag oggend haar net saggies aangevat en verduidelik dat ek saam met haar werk en nie vir haar nie. Dit het goed gegaan vir ‘n week of twee en skielik is sy weer haar ou gewone biatch…. Dis nie hieroor of daaroor nie, maar ek kan mos nie so werk nie. Damn man, ek is nou al te oud om rond te neuk wat werk aanbetref en soek nou ‘n werksplek waar ek gelukkig kan wees maak nie saak wat die salaris is nie.

Ek wens sulke mense wil besef hoe ongemaklik hulle die lewe vir ander maak. Ek tjank in die oggende voor werk, maar ek weet ek moet werk want ek het kinders om voor te sorg!!! Miskien moet ek maar my bekkie rek en “come hell or high water” die gevolge dra. Dis net nie vir my lekker om in onmin saam met iemand te werk of leef nie en mens is die meeste van die tyd by die werk!

Sy sit reg oorkant my en terwyl ek van haar skinder loer ek vir haar, en voel skuldig omdat my voete vuisies maak van lekkerte dat ek van haar skinder! Aai ek is pateties!!!

Nou ja ek sal maar vannaand gaan bid oor die saak en miskien sal Jesus haar sommer oornag uitsort!

Aai.

Junie 30, 2008 at 11:10 vm 4 Kommentaar

Halloooooooooooooo!

F@k , eintlik voel ek nie so vrolik nie, ek het lae bloeddruk (behalwe as ek aan my seun by die huis dink en weet hoe gaan dit lyk as ek van die werk af kom!!!) my oge willie lekka focus nie en my kop bly seer. Ek dink ek word nou oud of dis dalk net piep….

Francois het opgestaan in een van sy buie en ek was vir die eerste keer bly toe hy kleuterskool toe is.. Sies, ek het sommer skuldig gevoel daaroor, maar wraggies, ek het net nie krag gehad vir ‘n geskreeu in my ore vanoggend nie. Snaaks hoe mens kan lief bly vir iemand wat jou so freakin kwaad kan maak!!!!

Genoeg daarvan. Ek hoor volgende Maandag of ek nou permanent aangestel gaan word of nie! My senuwees is klaar! Dalk is dit waar die skielike hoofpyne en skete vandaan kom… Dis weer tyd om op my besem te klim en net te vlieg. Droom ek mos nou gisteraand Anton het iemand anders, ek moet vir hom ‘n kas bier gaan koop en ek kuier by kindertjies wat verstandelik gestrem is…. wat de f@k? As iemand kan drome uitlê, asseblief!!!! Ek sal like om te weet wat dit beteken.

So gepraat van kindertjies, ek het vir Marlenetjie ‘n grafsteen laat opsit by my pa se graf hier in Lydenburg, nie ‘n grafsteen nie, net so mooi tëel… Sy is in Witbank begrawe en kanse dat ek ooit daar gaan kom is so skraal en dan ook die feit dat dit so gevaarlik is daar. Is dit verkeerd? Ek twyfel nou of dit die regte ding was om te doen…. Oh well, gedane sake….

Ek gaan groet, eks biki besig vandag en ja, my kop is steeds seer!!!!

Toodles!!!

Hexi

Junie 23, 2008 at 11:34 vm 2 Kommentaar

Older Posts


Kategorieë

  • Blogroll

  • Feeds